Friday, October 12, 2012

مرشاتي ومخلطاتي

 

 

 

أنا سابقا كنت مدمنة مرشات ومخلطات لكن من حملت وأنا كارهتهم والحمدلله إن 3 أرباعهم خلصوا قبل لا أتوحم عليهمSick smile

 

IMG_0053 (400x299)

أول 2 ع اليمين من خالتي والخلطة الفضية من الشايع أما الثانية من مره تسويهم

مرش تايجر من الفودري وايد حلووو واكثر شي ماشي عندهم

واخر شي مخلط شيوخ من العربية بس جنه قطعوه

 

IMG_0119 (400x299)

 

بعدين خلطة المقام من أمل الكويت للملابس تصلح أكثر  بس غالية ما تستاهل سعرها

سعرها 6 ونص

ومخلط روعه من الفودري عادي وشتوي

 

IMG_0150 (400x299)

اللي ع اليمين

خلطة من المرشود كانت ياية مع مجموعة فيها 4 مرشات ب 10 دنانير والصراحة مرشاتهم حلوة وخفيفة واكثر شي عجبتني

 

بعدين مرش باتشولي من العبدالمحسن وطبعا شتوي وللبس

عقبه مرش عود من الفودري وهم حلو للبخور

 

مرش  الورود من امل الكويت كان مع مجموعه وما عجبتني ريحته

واخر شي العنابي شمعة حياتي ياي مع البخور ماله

ريحته غريبة وخالتي شاريته لي

بس حليو يعني مو توب

 

IMG_0151 (400x299)

اللي ع اليمين من المرشود بعد ياي مع مجموعة

وبعدين براااري من الشايع باااارد وريحته خفيفه

وبعدين ثراء من دار زكية ريحته بخور

ونوف من المرشود حلو ب 4 تقريبا

واخر شي حلو من الشايع اسمه 28

 

 

IMG_0152 (400x299)

هذول من امل الكويت مع مجموعة بعد بس ما عجبوني

احسهم يغمتون لازم معاهم بخور

 

Friday, September 7, 2012

مطعم المأدبة في الخفجي

 

 

بعد العيد رحت مع الأهل للخبر عشان أشتري عبي للدوام وبطريق ردتنا للكويت مرينا مطعم المأدبة في الخفجي عشان نتغدا. اخترنا مندي لحم ودجاج مع المشروبات والكنافة.

الخدمة سريعة لأن الأكل جاهز وقعدات المطعم صغيرة وضيقة حيل وماكو خصوصية كلش بس الحمدلله ما كان فيه أحد غيرنا.

طبعا دايم نطلب المندي ولازم يكون معاه دقوس بس هالمرة للأسف ما يابولناDon't tell anyone smile وحتى الايدامات أو المرق مثل ما نسميه ما كان موجود عندهم، فاكتفينا بالسلطة اللي أساسا تكون مع المندي بس ما يابوها وأبوي طلبها منهم وبالبصل والخضرة واللبن.

IMG_2287

IMG_2286

IMG_2292

مندي الدياي

IMG_2291

 

IMG_2289

الأسعار مكتوبة مثل ما تشوفون لكن سعر المندي مادري والله ما سألت عنه

تقيمي للأكل: 8\10

القعده: مابي أقيمها لأن كلش ما عجبتنا

 

 

الحمدلله على النعمة

تجربتي مع تونك راوش لتساقط الشعر

 
Rausch Hair Tonic Review
 
السلام عليكم ورحمة الله وبركاته
IMG_0325
 مرت علي فترة شعري كان يطيح خصل خصل خصل، لدرجة اني  لما أحط
ايدي بشعري، اشوف الشعر بإيدي، شنو السبب؟ الله أعلم بس أتذكر كان عندي نزيف وبنفس الفترة كنت استعمل حمام زيت فاتيكا مرة أسبوعيا لكن أتوقع السبب المباشر كان استخدامي لتونك كامينوموتو واللي استعملته لفترة ما زادت عن أسبوعين وبعدها فجأة قطعته.
المهم، هالمنتج أنا سألت الموظفة تعطيني تونك للتساقط ويصلح للحوامل لأن كنت مخططة على الحمل بس صراحة بعد ما حملت ما بقى منه إلا ربع العلبة بس خفت استعمله ووقفته.
 
سعره ب 7 دنانير اذا مو غلطانة لان شاريته من فترة.
التقييم: 8\10
أول أسبوع لاحظت التساقط خف بنسبة 75% ماشاءالله واستعمله مرة يوميا قبل النوم وبعد الشاور مباشرة قبل او بعد تجفيف شعري، أهم شي نطروا عليه يجف ساعة او ساعتين وريحته حلوة نفس الشامبو,
أنا استعملته لمدة شهر ونص أو شهرين وقطعته بسبة الحمل مثل ما ذكرت وماشاءالله التساقط خف بشكل كبير جدا ولله الحمد.
IMG_0327
 
الشركة سويسرية وهالمنتج شجعني أجرب المنتجات الثانية اللي عندهم بس إن شاءالله بعد الولادة.
دعواتكم لي بتيسير ولادتيSmile
 

Saturday, June 30, 2012

بخوري (دخوني) أموت على الطيب والبخور

 

 

غرامي البخور والطيب وأموت على العطور العربية والدخون. بوريكم مجموعتي وفي مجموعة ثانية يايه بالطريج بس هذي المقدمة

ماشاءالله

Winking smile

بسم الله

 

أول واحد شاريته من الماجد للعود بالخبر اسمه مبسوس الماجد

ريحته حلوة وتصلح لوقت العصاري والمغرب

Disappointed smileما أتذكر سعره للأسف

IMG_0368 (400x299)

 

الثاني عود بالمسك من أم عبدالله السليطي بقطر

ريحته حلوة لوقت الظهر وخاصة بعد الطبخ

مثل ما تشوفون خالص ماشاءاللهOpen-mouthed smile

IMG_0354 (400x299)

 

الثالث والرابع هذول غنيين عن التعريف، دخون ياس من الامارات سعره بحدود 21 دينار والثاني عود ملكي من القرشي

دخون ياس ريحته غريبة ومو الكل يتقبلها بس شنو ثااااااااااابت وبالذات اذا بخرتوا الكبت يقعد ثلاث أيام عالاقل والله ما أبالغ وميزته إن ريحته ما تقلب حطب نفس أغلب البخور

وبخور القرشي حلو للبيت بس مو ثابت وب 17 وغالي عليه صراحة.

 

IMG_0556 (400x267)

IMG_0568 (400x267)

 

 

الأسود على اليمين بخور معمول من الشايع، ريحته وييييع ريحة سمن Thumbs down

واللي بالنص معمول صلالة من دار الطيب بالمباركية ريحته نفس صابون تايد، حليو وسعره أظن ب 3 دنانير

والأخير عود مطيب من الجزيرة، ريحته نفس العود الأزرق بس ما عجبني صراحة للملابس لان يخلي ريحتهم حطب وكميته وايد شوي على سعره 20

أول وآخر مره أشتريه

IMG_0569

 

وآخر بخور واللي كله أكرره، بخور استبرق من أصغر علي. شكله نفس فيريرو روشيه، يهبل بس عيبه يتفتت ولازم ينحط بعلبة

سعره جنه ب 100 ريال

 

IMG_0570 (400x267)

وإن شاءالله في جزء ثاني للبخور بحطه لكم بعدين

Friday, June 8, 2012

تجربتي مع بخاخ ريجين للشعر


Regaine_MenGelWithBottle2
معاناتي مع شعري بدت من فترة وليلحين أعاني بس أهون من قبل الحمدلله. Smile
كنت مرة رايحة الصيدلية لأن أبي امبولات أو بخاخ ينبت الفراغات. نصحتني الموظفة ببخاخ ريجين وفيه مادة المينوكسيديل وما كنت أدري شنو هالمادة وما عرفتها إلا بعد ما شريت البخاخ.
طبعا شريته وعقبه قريت تجارب الناس عبر الانترنت. خذيت الأخضر اللي نسبته 2 % لأن الأزرق مخصص للرجال ونسبته 5%، عموما قريت التجارب وأغلبهم يقولون لازم اللي يستعمله يستمر عليه للأبد ولا الشعر يطيح!  واتذكر الصيدلانية قالت اقطعيه تدريجيا.  توكلت على الله وقلت أجربه. جربته شهر 6 اللي طاف وكنت أبخ 6 بخات مساء و6 صباحا خلال شهر ونص وماشاءالله والله خلال هالفترة شعري طلع! وبعدين خففت وخليتها 6 بخات يوميا وبعدين يوم وترك إلى مرتين أسبوعيا إلى أن قطعته بعد استعمال 4 شهور وتبارك الرحمن شعري طلع والفراغات امتلت لكن لاحظت بعد فترة قصيرة ان الشعر الطويل عندي بدأ يطيح وخفت ورحت الصيدلية وأخذت تونك الشعر والشامبو من ريجوفيل.
التوونك اسمه
Hair maintenance
استعمله مره يوميا قبل النوم والحمدلله الشعر اللي طلع الجديد ما طاح لكن بقت المشكلة بالشعر القديم الطويل! ووصراحة ما أنصحكم بالشامبو لأن ما فادني والتونك ما حسييته فادني.
سعر التونك كان 15 والشامبو 8 دنانير أتوقع
 الحمدلله شعري ماشاءالله أحسن من الحين
صراحة من تجربتي لبخاخ ريجين، أنصح فيه بس المهم إن مدة استعماله ما تجاوز 4 شهور لأن أتذكر الصيدلانية قالت لي هالكلام وأهم شي تقطعونه تدريجيا وتستخدمون بخاخ أو امبولات مقوية للشعر الجديد اللي يطلع.

تجربتي مع حبوب برايورين ان للشعر

 

أول بوست لي وأول افتتاحية لمدونتي وخلالها راح أعرض كل تجاربي بإذن الله Smile

 

IMG-20111219-WA018 (300x400)

 

سعرهم بحدود 23 وشريتهم من صيدلية بوتس وصراحة مو رخيصين ويمكن تحصلونهم بسعر أرخص في صيدليات ثانية بس نتيجتهم أعطيها 70 % وتجربتي لهم كانت لمدة شهر ونص حبتين يوميا بعد الأكل وأنا آخذهم قبل النوم. المفروض استعمالي لها ما يقل عن 3 شهور بس انا لظروف زواجي قطعتهم لأن خفت ما ألتزم

 

ملاحظاتي خلال هالفترة

مزاياها

شعري قل تساقطه خلال ثاني أسبوع تقريبا وأظافري كانوا يطولون بشكل غريب جدا وما تتكسر نهائيا ماشاءالله وأنا أساسا أظافري جدا هشة وبسرعة تتكسر.

عيوبها

فتحت شهيتي للأكل وزاد وزني منها Crying face

 

وبعد ما خلصت العلبة ردوا اظافري يتكسرون بس شعري خف تساقطه الحمدلله. أنصح اللي تبي تستخدمهم ما يقل استعمالها للحبوب عن 3 شهور وإن شاءالله تلقى فيهم نتيجة.